பல் பராமரிப்பு… கவனிக்க வேண்டிய விஷயங்கள்!

Loading...

பல் பராமரிப்பு... கவனிக்க வேண்டிய விஷயங்கள்!பல்… அழகு மற்றும் ஆரோக்கியக் காரணி! அதைப் பாதுகாத்துக்கொள்வதில் எழும் சந்தேகங்களுக்கு விடையளிக்கிறார், பல் மருத்துவத்தில் 53 ஆண்டுகள் அனுபவம் பெற்ற, சென்னை தி.நகரைச் சேர்ந்த ‘ஜே.ஜி.ஹெச்.ஆர் டோட்டல் டென்டல் கேர்’ மருத்துவமனையின் மருத்துவர், டாக்டர் ஜானகிராமன்.


“காலை, இரவு இரு நேரங்களிலும் பல்துலக்க வலியுறுத்தப்படுவதன் காரணம் என்ன?’’

“பல் சொத்தையைத் தவிர்க்கவே அவ்வாறு வலியுறுத்தப்படுகிறது. குறிப்பாக, இரவு நேரங்களில் சாப்பிடும் உணவுப் பொருட்கள் பற்களுக்கு இடையே ஒட்டிக்கொள்ளும். மேலும், உணவுப்பொருட்களில் உள்ள சுக்ரோஸை (இனிப்பு) பாக்டீரியாக்கள் சாப்பிட்ட பின்னர், லாக்டிக் அமிலத்தை பல், ஈறுகளின் மீது வெளியிடும்போது, அது ஒரு வெண்படலம் போன்று உருமாறும். அந்தப் படலம் தொடர்ந்து படியும்போது, காரையாக (Plaque) மாறி, பல் அரிப்பு ஏற்பட்டு பல்லானது சொத்தையாகும்.”

“பல் துலக்கும்போது ரத்தம் வரக் காரணம்?’’

“பற்களின் காரையை கவனிக்காமல் விட்டால், ஈறுகள் பலவீனம் அடைந்துவிடும். அதனால் பல் துலக்கும்போது, ஈறுகளில் ரத்தம் வரும். உயர் ரத்த அழுத்தம் உள்ளவர்கள் சிலருக்கும், பல் துலக்கும்போது ரத்தம் வரும். பற்களில் ரத்தம் வந்தால், ஆரம்ப கட்டத்திலேயே மருத்துவரை அணுக வேண்டும். பொதுவாக, ஆண்டுக்கு ஒரு முறையாவது பல் பரிசோதனை செய்துகொள்வது நல்லது.’’

“குழந்தைகளுக்குப் பால் பற்கள் விழுந்து நிரந்தரப் பற்கள் முளைக்க ஆரம்பிக்கும் போது கவனிக்க வேண்டிய விஷயங்கள்..?’’

“குழந்தைகள் வாயை திறந்துகொண்டே தூங்குவது, விரல் சூப்பிக்கொண்டே தூங்குவது, அடிக்கடி நாக்கு மற்றும் பென்சிலைக் கடித்துக்கொண்டே இருப்பது… இதெல்லாம் தவறு. இவ்வாறு செய்வதால் பால் பற்கள் விழுந்து நிரந்தரப் பற்கள் முளைக்கும் சமயத்தில் பற்கள் கோணலாகவும், சீரற்ற முறையிலும் வளர ஆரம்பிக்கும். பொதுவாக, குழந்தைகளுக்கு 7 – 12 வயதில் பால் பற்கள் விழுந்து, நிரந்தர பற்கள் முளைக்கும் சமயத்தில் குழந்தைகளின் பற்களை கவனமாகக் கண்காணிக்க வேண்டும். 12 வயதுவரை பற்கள் விழாமல் இருந்தால், கட்டாயம் மருத்துவரைச் சந்தித்து பரிசோதனை செய்ய வேண்டும்.”

“சூடான, குளிர்ச்சியான, கடினமான உணவுப் பொருட்களால் பற்களுக்கு ஏற்படும் பாதிப்பு..?”

“ஆரோக்கியமான பற்கள் குளிர்ச்சியான, சூடான, கடினமான பொருட்களை ஏற்றுக்கொள்ளும். சொல்லப்போனால் கடினமான உணவுகளை மென்று சாப்பிட பற்களுக்கு தொடர்ந்து வேலை கொடுக்கும்போது, அதன் வலிமை உறுதிபடும். அதனால்தான் கரும்பு சாப்பிடுவது பற்களின் ஆரோக்கியத்தை முன்னிறுத்தி வலியுறுத்தப்படுகிறது. சொத்தைப் பல் மற்றும் பல் ஈறுகளில் பாதிப்பு உடையவர்கள் குளிர்ச்சியான, சூடான பொருட்களைச் சாப்பிடும்போதுதான், பல் வலி மற்றும் பல் கூச்சம் ஏற்படும். அவர்கள் உடனடியாக மருத்துவரை அணுக வேண்டும்.”

“புகையிலைப் பொருட்கள், பற்களின் ஆரோக்கியத்தை பாழாக்குவது பற்றி?’’

‘‘தொடர்ந்து புகையிலைப் பொருட்களை பயன்படுத்து வதால், பற்களின் ஈறுகள் பாக்டீரியாக்களால் அரிக்கப்பட்டு, பல் சொத்தை, பல் வலி, பற்களில் கறை போன்ற பாதிப்புகள் ஏற்படும். மேலும், வாயினுள்ளே தொடர்ந்து புகையிலைப் பொருட்களை அடைத்து வைத்திருப்பதால் ‘ஓரல் கேன்சர்’ பாதிப்புக்கும் வாய்ப்பிருக்கிறது. புகையிலைப் பொருட்களை பயன்படுத்திய பின்னர், வாயை சுத்தம் செய்ய வேண்டும். படிப்படியாக புகையிலைப் பொருட்களை பயன்படுத்துவதை குறைத்துக்கொள்ள வேண்டும் என்பதே நல்ல தீர்வு.’’

‘‘சூயிங்கம் மெல்வது நல்லதா?’’

‘‘சூயிங்கம் மெல்லும்போது பற்களுக்குத் தொடர்ந்து வேலை கொடுக்கப்படுவதுடன், உமிழ்நீரும் சுரந்து கொண்டே இருப்பதால் பற்களுக்கு வலிமையைத் தரும். எனவே, சூயிங்கம் மெல்வது பற்களுக்கு ஆரோக்கியமானதே.”

“குழந்தைகளுக்கு புட்டிப்பால் கொடுப்ப தால் பல் பிரச்னை வருமா..?’’

“கண்டிப்பாக வரும். புட்டிப்பால் கொடுக்கும் பெரும்பாலான அம்மாக்கள், இரவு நேரங்களில் பால் பாட்டிலை குழந்தையின் வாயில் வைத்தபடியே தூங்கச் செய்கின்றனர். இதனால், குழந்தையின் பற்களில் பால் படிந்துவிடுகிறது. வாயில் எப்போதுமே இருக்கும் ‘ஸ்டிரெப்டோ காகஸ்’ (strepto coccus) பாக்டீரியா, பற்களில் படிந்திருக்கும் பாலுடன் வினைபுரிந்து பற்சொத்தையை ஏற்படுத்தும். சிறு குழந்தைகளுக்கு ஏற்படும் இத்தகைய பற்சொத்தை, ‘நர்ஸிங் பாட்டில் கேரீஸ்’ (Nursing bottle caries) எனப்படும். அம்மாக்கள், புட்டிகளின் மூலம் குழந்தைக்குப் பால் கொடுத்தவுடன், கவனமாக குழந்தையின் பல் மற்றும் நாக்குப் பகுதியை சுத்தம் செய்துவிட வேண்டும். அக்கால வழக்கத்தைப்போல சங்கு (பாலாடை) மூலமாக குழந்தைகளுக்குப் பால் கொடுப்பதே சிறந்த முறை.’’

“சீரற்ற பல் வரிசையை சரிசெய்ய கிளிப் அணியும்போது, கவனிக்க வேண்டிய விஷயங்கள் என்ன?”

“பற்களின் வரிசையை சீர்செய்ய, ‘ரிமூவபிள்’ மற்றும் ‘ஃபிக்ஸட்’ என இரண்டு வகையான கிளிப்கள் பயன்படுத்தப்படுகின்றன. சிறுவர்களுக்கு, ரிமூவபிள் வகை கிளிப்களைப் பயன்படுத்தலாம். விலை குறைவாக இருப்பதுடன் குறுகிய நாட்களிலேயே பற்களின் வரிசையை சீர் செய்துவிடலாம். 20 வயதுக்கு மேல் பல் வரிசையை சீர் செய்ய நினைத்தால், அதிகம் செலவாகும். மேலும், ‘ஃபிக்ஸட்’ வகை கிளிப்களைமட்டுமே அணிய முடியும்.’’

Loading...
Rates : 0
ads
VTST BN